Mali, Niger na Burkina Faso zimehitimisha mchakato wa kuundwa kwa muungano wao
Nchi za Mali, Niger na Burkina Faso ambazo zinaoongozwa na watawala wa kijeshi, zimetangaza kuhitimisha mipango ya kuundwa kwa muungano wao baada ya uhusiano kati ya mkoloni wao nchi ya Ufaransa kuingia doa.
Imechapishwa: Imehaririwa:
Katika siku za hivi karibuni, mataifa hayo ya Afrika Magharibi yameonekana kuegemea upande wa nchi ya Urusi ambazo inasema itazisaidia kumaliza matatizo ya utovu wa usalama.
Mawaziri wa mambo ya kigeni kutoka katika mataifa hayo matatu, Ijumaa ya wiki hii walikutana katika mji mkuu wa Niger, Niamey kuafikiana kuhusu uzinduzi wa muungano huo wa nchi za Sahel, maarufu kama Confederation of the Alliance of Sahel States (AES).
Kwa mujibu wa waziri wa mambo ya kigeni wa Niger, Bakary Yaou Sangare, lengo kuu la mkutano huo ilikuwa ni kuangazia namna muungano huo utafanya kazi.
Aidha ameeleza kuwa jina hilo jipya litajadiliwa wakati wa mkutano wa viongozi wa mataifa hayo bila kutaja tarehe ambayo watakutana.
Kwa upande wake, Waziri wa mambo ya nje wa Mali, Abdoulaye Diop baada ya kukutana na rais wa kijeshi wa Niger Abdourahamane Tiani, alisema ni rasimi sasa muungano mpya umezinduliwa.
Burkina Faso nayo iliwakilishwa kwenye mkutano huo na waziri wake wa mambo ya kigeni Karamoko Jean-Marie Traore.
Ukanda wa Sahel umekuwa ukikabiliwa na changamoto za kiusalama kutoka kwa wanajihadi kwa miaka kadhaa sasa, nchi za ukanda huo zikiituhumu Ufaransa kwa kushindwa kuyakabili makundi yenye silaha.
Mwezi Januari mwaka huu, nchi za Mali, Niger na Burkina Faso zilitangaza kuwa zinajiondoa katika muungano wa ECOWAS.